اهلين بنات اليوم حانشرح موضوع مش أول مرة نتكلم عليه تكلمت عليه فى السناب شات اكثر من مرة ولكن هذه اول مرة نشرح الاندرتون فى المدونة
فى مرة شفتى فاونديشن وجربتيه فى المحل وعجبك ولما شريتيه وروحتى لقيتيه تغير لونه لرصاصى ؟؟
فى مرة لبستى بلوزة حمراء وطلعت تهبل عليك وبعدها عجبك قفطان احمر ولما لبستى ماطلعش عليك ؟؟
فى مرة عجبك اكسسوار لابساته اختك لونه حلو ولما لبستيه ماطلعش عليك ؟؟
او مرة شفتى لون صبغة على شعر فنانة وعجبك ولما درتيه ماطلعش عليك حلو ؟؟
فى مرة شفتى عدسات عجبوك على صاحبتك ولما لبستيهم ماعجبوكش ؟؟
مشاكل زى هذه كلنا مرينا بيها اكيييد والأغلب اساس المشكلة الرئيسى هو جهلنا بالاندرتون الخاص بينا وهذا يخلينا نختارو لبس ومكياج وعدسات والوان مش مناسبة لينا وماتطلعش علينا والنتيجة محبطة فى الاخير
من الصبح وانتى تتكلمى على الاندرتون شن هوا ؟؟؟؟
الأندرتون (Undertone) هو الصبغة المخفية في الجلد واللي تكون لون الجلد و تحدد لو كان الشخص يمتلك بشرة"دافئة" أو باردة"
مصطلح الأندرتون مختلف نهائيا على مصطلح لون الجلد (Skin tone) بحيث أن لون الجلد هو اللون الى نشوفو فيه و اللي ممكن يتغير بعدة عوامل مثلا :
- الحالة الصحية للبشرة تهيج البشرة أو استخدام أدوية معينة تأثر على لون الجلد
- فصول السنة تغير لون البشرة من الشمس والعوامل المؤثرة
- العمر مع تقدم العمر تكثر التصبغات والكلف والنمش
المهم فى ان نعرفو الاندرتون الخاص بينا اننا نختارو الالوان اللى تليق بينا والاكسسوار والفاونديشن والملابس والصبغات والمناكير المناسبة لينا وأيظا الخلفية والاثاث المناسب ليك فى التصوير
كيف نعرف الاندرتون متاعى وكيف نختار الالوان الصحيحة
الاندرتون ينقسم لـ 3 انواع
اندرتون بارد cool
اندرتون دافى warm
اندرتون محايد neutral
زى اللى فى الصورة
الاندرتون البارد
يعني أن الجلد يحتوي بشكل رئيسي على صبغة بودرية / موف / زرقاء .
أصحاب الأندرتون البارد التان صعب هلبا عليهم و بشرتهم تنحرق بسرعة من الشمس
و نفس الشيء مش كل وحدة بشرتها فاتحة تكون بالضرورة الأندرتون متاعها بارد
الاندرتون المحايد
يعنى ان الجلد يحتوي على صبغات باردة و دافئة في نفس الوقت.
و فيه ناس تصنف أصحاب البشرة الزيتونية بان هما أصحاب ألاندرتون المحايد لأنه خليط من الأزرق و الأصفر،
لكن الأغلب يصنفوه دافيء لأنه في أغلب الحالات يكون اللون الأصفر طاغي على صبغة الجلد.
الاندرتون الدافئ Warm
يعني أن لون الجلد يحتوي بشكل رئيسي على صبغة صفراء / ذهبية / زيتونية
أصحاب الأندرتون الدافيء ما تنحرقش بشرتهم من الشمس بسرعة،
بس تسمر بشرتهم بسرعة، يعني عملية التان سهلة جدا ليهم.
ولازم تعرفو ان مش كل اصحاب البشرة صفراء يكون بالضرورة الأندرتون متاعهم دافيء لأنه زي ما قلنا من ألاول لون الجلد يختلف بشكل نهائي على الأندرتون ،
والدليل على هذا الاشخاص من شرق اسيا اكبر مثال على الشئ هذا فى الاغلب بشرتهم تكون صفراء واضحة جدا طبعا هذا مش معناها ان كلهم اندرتونهم دافئ بمعنى ممكن تلقى فيهم البارد والمحايد
الصور هذه حاتوضحلكم كل اللى كتبته
صور اسيويات بأندرتون مختلف دافئ ومحايد (طبيعى) وبارد
صور لأصحاب البشرة الفاتحة بأندرتون مختلف دافئ ومحايد (طبيعى) وبارد
كيف نعرف الاندرتون الخاص بيا ؟؟
فى اكثر من اختبار لمعرفة الاندرتون الخاص بيك وطبعا مش لازم اديريهم كلهم باش تعرفى الاندرتون الخاص بيك
1- في الليل لما تكونى تعبانه ( أحسن وقت لأن في الصبح تكون البشرة قاعدة مش مصحصحة و نهاية اليوم تكون البشرة تعبانة)
إلبسي روب أبيض وغطى شعرك بفوطة بيضاء و الافضل تكون الخلفية بيضاء
وابدى شوفى روحك فى المراية وحاولى تكتشفى شن الالوان المخفية فى بشرتك ؟؟؟ شفتى اخضر او ازرق او اصفر يعنى بشرتك شن عاطية لون ؟؟ اكيد فى من يقول هذه شن تقول او شن تخرف بس اتبعو الخطوات حاولى تركزى على جسمك كله مش بس وجهك خاصة جيهة الرقبة وفوق الصدر وتحت ذراعك
انى نتفكر مرات نبدا نشوف فى وجهى لما نكون تعبانه نقول وعلاش لونى مش ابيض ولونه قلب على ازرق داكن
لأن الاندرتون متاعى ازرق على موف
لو ماقدرتيش اديرى الاختبار هذا ديرى الاختبار الثانى
2-اعرفى اندرتونك بلون عروقك .. فى اضائة كويسة شوفى للعروق متاع يدك شن لونها لو لونها اخضر يعنى اندرتونك دافي
لو لون عروقك ازرق او موف يعنى اندرتونك بارد
او عروقك زرقاء وخضراء بيكون اندرتونك محايد
ولو الطريقة هذه ماعرفتيش تميزى بيها اندرتونك ديرى الاختبار الثالث
3-اكسسواراتك شن يطلع عليك ؟؟ الذهبى او الفضى ؟؟ والا مافيش فرق بيناتهم ؟؟
طلعى اكسسوار ذهبى وفضى والبسيهم فى نفس الوقت وقارنى وشوفى شن اللى طلع عليك اكثر ؟
وقارنى بيناتهم لو الذهبى طلع عليك يعنى اندرتونك دافئ
ولو الفضى طلع عليك يعنى اندرتونك بارد
ولو الاثنين مافيش فرق اندرتونك بيكون محايد
ونفس الطريقة ممكن تستخدمى قفطان فضى او ذهبى
واكيد لبسك اليومى والالوان وشوفى شن اكثر الالوان اللى تطلع عليك وقارنيها بعجلة الالوان بالالوان الدافية والباردة والطبيعية
- اختيار كريم الاساس بالأندرتون الخاص بك
لما بنختارو كريم الاساس الموضع يختلف يعنى مانقدروش نقولو لكل قاعدة شواذ او انك تقدرى تجربى اى كريم اساس
لأن لما بتختارى كريم الاساس لازم يكون مطابق لأندرتونك ومناسب للون بشرتك
وباش بيسهل علينا اختيار الفاونديشن فى مجموعة مصطلحات والوان تستخدم بشكل عام فى اسماء كريمات الاساس
واول ماتكونو عارفينها حايسهل عليكم معرفة لو كان الفاونديشن هذا مناسب للاندرتون متاعك او لا
لو كان الأندرتون متاعك دافيء، على الاغلب يكون الفاونديشن اللي يناسبك اسمه يحتوي على مصطلحات
(على سبيل المثال ):
Yellow
Golden
Gold
Caramel
Peach
Bronze
NC (فاونديشنات ماك)
Warm
Tan
Marble
Sand
Desert
و لو كان بارد دوري على مصطلحات
(على سبيل المثال ):
Pink
Cool
NW (فاونديشنات ماك)
mahogany
Porcelain
Vanilla
Ebony
ولو كان محايدة دوري على مصطلحات
Neutral
Beige
chestnut
Almond
flesh
طبعا هذه المصطلحات تختلف من ماركة لماركة و من درجة لدرجة وهكى صعب انى نكون نعرفها كلها
بس اغلب المصطلحات موجودة فى الوان كريمات الاساس
وطبعا نصيحة لكل وحدة تشرى فاونديشن خودى وقتك فى اختيار الفاونديشن المناسب ممكن اديرى تست وتقعدى بيه ساعات وتشوفى هل مناسب او لا ولازم تشوفى الفاونديشن فى اضائة كويسة والأفضل انك تاخدى تستير من المحل وممكن ترفعى معاك علبة عدسات وتاخدى فيها اكثر من درجة وتجربيها براحتك فى الحوش خاصة لو الماركة اول مرة تجربيها
وان شألله نكون اختصرت الموضوع عارفه ان الموضوع طويل بس لازم باش تفهموه ويارب تكونو استفدتو
